४ माघ, काठमाण्डौं । राष्ट्रपति डा. रामबरण यादब दलहरुको निर्णयहीनतालाई लिएर देशबासीका नाममा सम्बोधन गर्ने निष्कर्षमा पुगेका छन् । राजनीतिक दलहरुले आगामी जेठमा संविधानसभा निर्वाचन गर्ने गरी तत्काल सहमतीय सरकार गठनको सहमति नगरे देशबासीलाई सम्बोधन गर्ने निष्कर्षमा राष्ट्रपति पुगेका हुन् ।
आफुले नौं पटकसम्म राष्ट्रिय सहमतिको सरकार गठनका लागि आह्वान गरेर संवैधानिक भूमिका निर्वाह गर्दै आए पनि दलहरु असफल भएकोमा तीब्र असन्तुष्टि जनाउँदै राष्ट्रपति यादब सो निष्कर्षमा पुगेको शीतल निवास स्रोतलाई उदृत गर्दै राजधानी दैनिकले खबर छापेको छ ।
मंगलबार शीतलनिवासमा विघटित संविधानसभाका १९ दलको बैठकमा असन्तुष्टि जनाउँदै उनले संबैधानिक दायराभित्रै रहेर आफुले सम्बोधनमार्फत राष्ट्र र जनतासामु प्रक्रिया सुरु गर्नाको कारण प्रस्ट्याउने भन्दै त्यसका निम्ति दलहरुले नै अनुमति दिनुपर्ने धारणासमेत राखेका छन् । समयसीमा तोकेर आह्वान गर्ने अघिल्ला शृखंला तोडेर राष्ट्रपतिले मंगलबार नै सहमतिको सरकार गठनका निम्ति पुनः आह्वान गरिसकेका छन् ।
