८ बर्ष अगि पत्रकार थापालाई जिउँदै गाडिएको खुलासा

दैलेखका पत्रकार डेकेन्द्रराज थापालाई कुटपिटपछि जिउँदै खाल्डोमा पुरेर मारेको रहस्य खुलेको छ । उनको हत्या अभियोगमा पक्राउ परेकाहरूले चरम यातनापछि सास छँदै खाल्डोमा पुरेको प्रहरीसमक्ष बयान दिएपछि यो रहस्य खुलेको हो । पक्राउ परेकामध्ये लछीराम घर्तीले प्रहरीलाई दिएको प्रारम्भिक बयानअनुसार थापालाई चार दिनसम्म चरम यातना दिइएको र अन्तिम दिनको यातनामा होस गुमाएपछि म¥यो भन्दै खाल्डोमा गाडिएको थियो । घर्तीले आफूले खाल्डो खनेको र हत्यामा नौजना संलग्न रहेको बयान दिएका छन् ।पत्रकार थापालाई तत्कालीन माओवादी कार्यकर्ताहरूले खानेपानीको विवाद मिलाउनुपर्ने भन्दै १२ असार २०६१ मा अपहरण गरेर २७ साउनमा हत्या गरेका थिए । प्रहरीले हत्यामा संलग्नमध्ये पाँचजनालाई शनिबार पक्राउ गरेको थियो । पक्राउ पर्नेमा घर्तीका साथै हरिलाल पुनमगर, वीरबहादुर केसी, निरकबहादुर घर्ती मगर र जयबहादुर शाही छन् । वीरबहादुर एमाओवादीका जिल्ला सदस्य हुन् भने बाँकी सकै नेकपा–माओवादीमा आबद्ध छन् । जयबहादुर सो पार्टीका भेरी–कर्णाली राज्य समिति सदस्य हुन् । प्रहरी निरीक्षक विनोद शर्माले दिएको जानकारीअनुसार पत्रकार थापाको ढुकढुकी बाँकी रहेकै अवस्थामा उनलाई लतार्दै लगेर गाडिएको खुलेको छ । भिडियो हेर्न को लागि यहाँ क्लिक गर्नुहोला हालसम्म पक्राउ परेका सबैले हत्यामा संलग्न भएको स्वीकार गरेको समेत प्रहरीले जानकारी दिइएको छ । उनीहरूले पत्रकार थापालाई जिउँँदै गाडेको लछीरामको बयानमा सहमति जनाएका छन् । हत्यारालाई कानुनी कारबाहीको माग गर्दै दैलेख सदरमुकाममा आइतबार पनि प्रदर्शन गरिएको छ । जिल्लामा रहेका मानव अधिकारवादी संघ÷संगठन, महिला र सदरमुकामका बासिन्दाहरूले दैलेख बजारमा प्रदर्शन गरेका हुन् । नेकपा–माओवादी र एमाओवादीले पक्राउ परेकालाई छोड्न दबाब दिँदै धम्कीपूर्ण विज्ञप्ति जारी गरेपछि आक्रोशित स्थानीयहरूले जिल्ला प्रहरी कार्यालयमा एक घन्टासम्म धर्नासमेत दिएका थिए । हत्यामा संलग्न भएको भन्दै किटानी जाहेरीमा उल्लेख गरिएका द्वारी गाविसका लछीरामलाई सरकारी वकिलको कार्यालयबाट बयान लिएर फर्कने क्रममा स्थानीयहरूले कडा कारबाही गर्न माग गरेका थिए ।दैलेख जिल्ला अदालतले पक्राउ परेका पाँचजनालाई पाँच दिनको म्याद थप गरेको छ । उनीहरूबारे थप अनुसन्धान भइरहेको जिल्ला प्रहरी कार्यालयले जानकारी दिएको छ । पत्रकार थापा हत्याबारे सत्यतथ्य छानबिनको माग गर्दै दैलेख सदरमुकाममा आएका नेपाल पत्रकार महासंघ, नेपाल प्रेस युनियन, प्रेस चौतारी नेपाल, पत्रकार महासंघ सुर्खेत, क्रान्तिकारी पत्रकार संघ, क्रान्तिकारी पत्रकार महासंघ, प्रगतिशील पत्रकार संघ, नागरिक समाजलगायतले विज्ञप्ति जारी गरी धम्कीपूर्ण व्यवहार प्रदर्शन नगर्न नेकपा–माओवादी र एमाओवादीसमक्ष आग्रह गरेका छन् ।