चार दिनअघि दाङको तुलसीपुरस्थित बैंक अफ काठमाडौको शाखामा भएको लुटपाटका प्रमुख योजनाकार सोही बैंकका क्यासियर रहेको खुलेको छ । पटक-पटक बैंकको रकम हिनामिना गरिसकेका क्यासियर खगेन्द्र बस्नेतले हिसाब मिलान गर्न अप्ठारो भएपछि काठमाण्डौंबाट लुटेरा बोलाएर लुटपाटको योजना बनाएको प्रहरी अनुसन्धानबाट खुलेको छ । तीन जनाको समूहमा आएका लुटेराहरुले बैंकवाट शुक्रवार साँझ बैंकको शाखावाट २ करोड ६ लाख ३३ हजार ८ सय ४४ रुपैयाँ लुटेका थिए ।
बयानका क्रममा बस्नेतले पटक-पटक गरि बैंकको करिब ८५ लाख रुपैयाँ हिनामिना गरेको र हिसाब मिलान गर्न अप्ठारो हुँदा लुटपाटको नाटक गर्नु परेको बयान दिएका छन् । बस्नेतले सेवाग्राहीले डिपोजिट गर्न ल्याएको रकम पनि खातामा डिपोजिट नगरि आफैले राख्ने गरेको खुलेको छ । बैंकबाट २ करोड ६ लाख बढी लुटिएको भनिए पनि केही रकम पहिले नै निकालिएको प्रहरीले अनुमान गरेको छ । बस्नेतको साथमा उनले काटेको ९ लाख ९० हजारको चेक पनि प्रहरीले बरामद गरेको छ । घटनाका बारेमा अनुसन्धान गर्नका लागि क्षेत्र, अञ्चल, जिल्ला, इलाका, शसस्त्रका प्रहरी र केन्द्रीय अनुसन्धान व्युरोको टोलि पनि दाङमा खटिएको छ । प्रहरीले अनुसन्धान जारी रहेको भन्दै घटनाबारे औपचारिक जानकारी भने दिएको छैन् ।
