पूर्वपतिका घर आँगनमै जग्गे लगाएर अँस्ती मात्रै पुनर्विवाह गरिएकी गुल्मी तमघासकी एकल महिला उषा नेपालीले दुलहन फर्काउने माइतीघर पनि पूर्वपतिकै घर बनाएकी छन् ।
गुल्मीको जैसीथोक माइतीघर भई तम्घास ३ बाघमारेमा विवाह भएकी उषा नेपाली विवाहको डेढ वर्ष नहुँदै विधुवा हुनुपरेको थियो। २०६४ साल असार महिनामा उनका पूर्व श्रीमान् प्रदिप नेपालीको तमघासकै उदिनढुङ्गा तलको भीरमा रहस्यमय मृत्यु भएको थियो ।
"यो मेरो पराईघर नभएर जन्मघर भन्दा पनि ठूलो योद्धाघर बनेको छ", उनको प्रतिक्रिया थियो । "जीवन संघर्ष हो", उषाले भनिन्, "यो घरले मलाई संघर्ष गर्न सिकायो मलाई एउटा योद्धाका रुपमा तयार पा¥यो । जन्मघर जैसीथोकमा नगई हामी आज पूर्वपति प्रदिपकै घरमा माइती बनाउन आएका छौँ" भन्ने उषालाई सासु लक्ष्मी नेपाली र ससुरा सुर्यबहादुर नेपाली अँगालो हालेर भित्र पसाएका थिए ।
यो विवाह जिल्लामै नयाँ इतिहास रच्ने विवाह भनेर राष्ट्रिय सञ्चार माध्यमले समेत महत्वका साथ प्रचार प्रसार गरेका छन् । उषा हिमालय उच्च माध्यमिक विद्यालय धुर्कोटबस्तुमा कक्षा १२ की विद्यार्थी हुन् ।
सासु आमा, जेठाजु कृष्ण नेपाली र देवर शंकर नेपालीले आफै केटा मागेर विवाहको प्रस्ताव गरेपछि नकार्न सकिन भन्दै उषाले आफुजस्तै कलिलो उमेरमा विधुवा बन्ने दिदिबहिनीहरुलाई यसरी नै दोस्रो विवाह गर्न सुझाव दिइन ।
विवाहको अघिल्लो दिनसम्म विधुवाको पहिरनमा उराठलाग्दी उषालाई आज दुलान फर्काउन आउँदा रातो साडी सिउँदोमा सिन्दूर साथमा कोट पाइन्टमा सजिएका नवदुलाहा देख्दा बाघमारे टोलका महिलाहरुको आँखामा खुसीका आँसु बगिरहेका थिए ।
